dard kam hone laga aao ki kuchh raat kaTe

dard kam hone lagā aao ki kuchh raat kaTe

ġham kī mī'ād baḌhā jaao ki kuchh raat kaTe

hijr meñ āh-o-bukā rasm-e-kuhan hai lekin

aaj ye rasm hī duhrāo ki kuchh raat kaTe

yuuñ to tum raushnī-e-qalb-o-nazar ho lekin

aaj vo mo'jiza dikhlāo ki kuchh raat kaTe

dil dukhātā hai vo mil kar bhī magar aaj kī raat

usī be-dard ko le aao ki kuchh raat kaTe

dam ghuTā jaatā hai afsurda-dilī se yaaro

koī afvāh hī phailāo ki kuchh raat kaTe

maiñ bhī be-kār huuñ aur tum bhī ho vīrān bahut

dosto aaj na ghar jaao ki kuchh raat kaTe

chhoḌ aa.e ho sar-e-shām use kyuuñ 'nāsir'

use phir ghar se bulā laao ki kuchh raat kaTe

dard kam hone laga aao ki kuchh raat kaTe

gham ki mi'ad baDha jao ki kuchh raat kaTe

hijr mein aah-o-buka rasm-e-kuhan hai lekin

aaj ye rasm hi duhrao ki kuchh raat kaTe

yun to tum raushni-e-qalb-o-nazar ho lekin

aaj wo mo'jiza dikhlao ki kuchh raat kaTe

dil dukhata hai wo mil kar bhi magar aaj ki raat

usi be-dard ko le aao ki kuchh raat kaTe

dam ghuTa jata hai afsurda-dili se yaro

koi afwah hi phailao ki kuchh raat kaTe

main bhi be-kar hun aur tum bhi ho viran bahut

dosto aaj na ghar jao ki kuchh raat kaTe

chhoD aae ho sar-e-sham use kyun 'nasir'

use phir ghar se bula lao ki kuchh raat kaTe