dard ki daulat-e-nayab ko ruswa na karo

dard kī daulat-e-nāyāb ko rusvā na karo

vo nazar raaz hai us raaz kā charchā na karo

vus.at-e-dasht meñ dīvāne bhaTak jaate haiñ

dosto āhu-e-ram-ḳhurda kā pīchhā na karo

tum muqaddar kā sitāra ho mire paas raho

tum jabīn-e-shab-e-namnāk pe ubhrā na karo

pas-e-dīvār bhī dīvār kā aalam hogā

tum yūñhī rauzan-e-dīvār se jhāñkā na karo

ghar palaT aane meñ āfiyat-e-jāñ hai yaaro

jab havā tez chale raah meñ Thahrā na karo

yā dil-o-dīda ko tanvīr-e-mohabbat baḳhsho

yā dam-e-sub.h zamāne meñ ujālā na karo

ye jahān-e-guzarāñ haath kise aayā hai

pīchhe muḌ muḌ ke kisī shaḳhs ko dekhā na karo

bhāgte lamhe ko kab rok sakā hai koī

vo to ik saaya hai saa.e kī tamannā na karo

sar salāmat nahīñ rahte haiñ zabāñ kaTtī hai

pattharoñ ko kabhī bhūle se bhī sajda na karo

pyaas bujhtī hai kahāñ tapte bayābānoñ kī

mirī āñkhoñ mirī āñkho yūñhī barsā na karo

ziist hai tez-qadam aage nikal jā.egī

tum kisī moḌ pe rukne kā irāda na karo

kuchh idhar saa.e haiñ jo baḌh ke lipaT jaate haiñ

'aḳhtar' is raah se ho kar kabhī guzrā na karo

dard ki daulat-e-nayab ko ruswa na karo

wo nazar raaz hai us raaz ka charcha na karo

wusat-e-dasht mein diwane bhaTak jate hain

dosto aahu-e-ram-KHurda ka pichha na karo

tum muqaddar ka sitara ho mere pas raho

tum jabin-e-shab-e-namnak pe ubhra na karo

pas-e-diwar bhi diwar ka aalam hoga

tum yunhi rauzan-e-diwar se jhanka na karo

ghar palaT aane mein aafiyat-e-jaan hai yaro

jab hawa tez chale rah mein Thahra na karo

ya dil-o-dida ko tanwir-e-mohabbat baKHsho

ya dam-e-subh zamane mein ujala na karo

ye jahan-e-guzaran hath kise aaya hai

pichhe muD muD ke kisi shaKHs ko dekha na karo

bhagte lamhe ko kab rok saka hai koi

wo to ek saya hai sae ki tamanna na karo

sar salamat nahin rahte hain zaban kaTti hai

pattharon ko kabhi bhule se bhi sajda na karo

pyas bujhti hai kahan tapte bayabanon ki

meri aankhon meri aankho yunhi barsa na karo

zist hai tez-qadam aage nikal jaegi

tum kisi moD pe rukne ka irada na karo

kuchh idhar sae hain jo baDh ke lipaT jate hain

'aKHtar' is rah se ho kar kabhi guzra na karo