dard ki jab intiha ho jaegi

dard kī jab intihā ho jā.egī

intihā ḳhud hī davā ho jā.egī

rābta rakhiye ġhamoñ se ḳhud-ba-ḳhud

zindagī ġham-āshnā ho jā.egī

kar na ai dil shikva-e-jaur-o-jafā

varna tauhīn-e-vafā ho jā.egī

bas unheñ aane to do phir dekhnā

dil kī duniyā kyā se kyā ho jā.egī

chhoḌ doge saath agar tum bhī mirā

zindagī be-āsrā ho jā.egī

kyā ḳhabar thī surḳhī-e-ḳhūn-e-jigar

sūrat-e-rang-e-hinā ho jā.egī

hausla rakhiye kabhī āsān bhī

manzil-e-rāh-e-vafā ho jā.egī

naaz hastī par 'nasīr' itnā na kar

ik na ik din ye fanā ho jā.egī

dard ki jab intiha ho jaegi

intiha KHud hi dawa ho jaegi

rabta rakhiye ghamon se KHud-ba-KHud

zindagi gham-ashna ho jaegi

kar na ai dil shikwa-e-jaur-o-jafa

warna tauhin-e-wafa ho jaegi

bas unhen aane to do phir dekhna

dil ki duniya kya se kya ho jaegi

chhoD doge sath agar tum bhi mera

zindagi be-asra ho jaegi

kya KHabar thi surKHi-e-KHun-e-jigar

surat-e-rang-e-hina ho jaegi

hausla rakhiye kabhi aasan bhi

manzil-e-rah-e-wafa ho jaegi

naz hasti par 'nasir' itna na kar

ek na ek din ye fana ho jaegi