dard ki jo koi dawa jaane

dard kī jo koī davā jaane

vahī kuchh ishq kā maza jaane

koī dil kī kisī ke kyā jaane

ġhaib kī baat ko ḳhudā jaane

ham to daanā usī ko kahte haiñ

jo hasīnoñ ko bevafā jaane

dil-e-gum-gashta kā jo pūchhā haal

bole muñh pher kar ḳhudā jaane

mai-kade meñ paḌe the kal zāhid

kaun aaj un ko pārsā jaane

husn-e-zan bas isī ko kahte haiñ

ki har ik chiiz ko bhalā jaane

āshiqī ke liye hai shart 'ḳhayāl'

ki jafāoñ ko bhī vafā jaane

dard ki jo koi dawa jaane

wahi kuchh ishq ka maza jaane

koi dil ki kisi ke kya jaane

ghaib ki baat ko KHuda jaane

hum to dana usi ko kahte hain

jo hasinon ko bewafa jaane

dil-e-gum-gashta ka jo puchha haal

bole munh pher kar KHuda jaane

mai-kade mein paDe the kal zahid

kaun aaj un ko parsa jaane

husn-e-zan bas isi ko kahte hain

ki har ek chiz ko bhala jaane

aashiqi ke liye hai shart 'KHayal'

ki jafaon ko bhi wafa jaane