dard ki jot mere dil mein jagane wale

dard kī jot mire dil meñ jagāne vaale

roz paiġhām nayā de ke rulāne vaale

kaise likh duuñ maiñ tire naam fasāna koī

biich mañjdhār meñ kushtī ko Dubāne vaale

na koī 'aks na zañgār rahā mere liye

ruuh ke shīshe ko shaffāf banāne vaale

kyā nahīñ likkhā nigāhoñ ko rahīn-e-jalva

apnī tahrīr se taqdīr sajāne vaale

misl-e-parvāna taḌapne ke liye chhoḌ diyā

sham-e-gumnām se jazboñ ko jalāne vaale

kisī tā'bīr ko takmīl to pā jaane de

ḳhvāb har roz nayā mujh ko dikhāne vaale

azm-e-mohkam liye maiñ pesh nazar aa.ī huuñ

tiir alfāz kā be-ḳhauf chalāne vaale

vaqt ab bhī hai sañbhal jaao ye duniyā hai fareb

pyaar ke Dhoñg meñ logoñ ko phañsāne vaale

vaqt ab duur nahīñ hai ki uThe shor-e-ġhazab

ġham ke sailāb meñ duniyā ko bahāne vaale

dard ki jot mere dil mein jagane wale

roz paigham naya de ke rulane wale

kaise likh dun main tere nam fasana koi

bich manjdhaar mein kushti ko Dubane wale

na koi 'aks na zangar raha mere liye

ruh ke shishe ko shaffaf banane wale

kya nahin likkha nigahon ko rahin-e-jalwa

apni tahrir se taqdir sajaane wale

misl-e-parwana taDapne ke liye chhoD diya

sham-e-gumnam se jazbon ko jalane wale

kisi ta'bir ko takmil to pa jaane de

KHwab har roz naya mujh ko dikhane wale

azm-e-mohkam liye main pesh nazar aai hun

tir alfaz ka be-KHauf chalane wale

waqt ab bhi hai sanbhal jao ye duniya hai fareb

pyar ke Dhong mein logon ko phansane wale

waqt ab dur nahin hai ki uThe shor-e-ghazab

gham ke sailab mein duniya ko bahane wale