dard mein jab kami si hoti hai

dard meñ jab kamī sī hotī hai

dil taḌaptā hai aañkh rotī hai

vasl kī raat raat hotī hai

qalb bedār aañkh sotī hai

sāmne un ke lab nahīñ khulte

band goyā zabān hotī hai

ek qatra hai un kī mizhgāñ par

yā koī lā-javāb motī hai

bahr-e-ulfat meñ kashti-e-dil ko

mauja-e-ummīd hī Dubotī hai

aañkh kahtī hai ġham ke afsāne

ek aisī ghaḌī bhī hotī hai

dil meñ chuTkī sī le rahā hai kaun

aañkh kyuuñ baar baar rotī hai

mil ke do qalb jab bichhaḌte haiñ

zindagī zindagī ko rotī hai

ġham kī rūdād pūchhne vaale

āñsuoñ kī zabān hotī hai

dil jalā āsmāñ na jal jaa.e

āh-e-bekas ḳharāb hotī hai

be-zarūrat sī guftugū 'shātir'

e'tibār aadmī kā khotī hai

dard mein jab kami si hoti hai

dil taDapta hai aankh roti hai

wasl ki raat raat hoti hai

qalb bedar aankh soti hai

samne un ke lab nahin khulte

band goya zaban hoti hai

ek qatra hai un ki mizhgan par

ya koi la-jawab moti hai

bahr-e-ulfat mein kashti-e-dil ko

mauja-e-ummid hi Duboti hai

aankh kahti hai gham ke afsane

ek aisi ghaDi bhi hoti hai

dil mein chuTki si le raha hai kaun

aankh kyun bar bar roti hai

mil ke do qalb jab bichhaDte hain

zindagi zindagi ko roti hai

gham ki rudad puchhne wale

aansuon ki zaban hoti hai

dil jala aasman na jal jae

aah-e-bekas KHarab hoti hai

be-zarurat si guftugu 'shatir'

e'tibar aadmi ka khoti hai