dard-o-gham ki qaid se rah-e-mafar koi nahin

dard-o-ġham kī qaid se rāh-e-mafar koī nahīñ

ye vo ghar hai jis kī dīvāroñ meñ dar koī nahīñ

rāste masdūd hote jā rahe haiñ bhiiḌ se

aao us jānib hī chalte haiñ jidhar koī nahīñ

qatl chorī ābrū-rezī ḳhasāre kā bajaT

aaj ke aḳhbār meñ achchhī ḳhabar koī nahīñ

mas.aloñ kī maar se chehre haiñ murjhā.e hue

aisā lagtā hai jahāñ meñ be-zarar koī nahīñ

is qadar firqa-parastī har galī har moḌ par

nafratoñ ke shahr meñ mahfūz ghar koī nahīñ

pūchhtī haiñ zard āñkheñ muflisī kī oT se

kyā sunahre ḳhvāb kā ab naqsh-gar koī nahīñ

toḌ kar rishtoñ ke bandhan chhoḌ jaate haiñ sabhī

saath detā hai 'sharāfat' umr bhar koī nahīñ

dard-o-gham ki qaid se rah-e-mafar koi nahin

ye wo ghar hai jis ki diwaron mein dar koi nahin

raste masdud hote ja rahe hain bhiD se

aao us jaanib hi chalte hain jidhar koi nahin

qatl chori aabru-rezi KHasare ka bajaT

aaj ke aKHbar mein achchhi KHabar koi nahin

masalon ki mar se chehre hain murjhae hue

aisa lagta hai jahan mein be-zarar koi nahin

is qadar firqa-parasti har gali har moD par

nafraton ke shahr mein mahfuz ghar koi nahin

puchhti hain zard aankhen muflisi ki oT se

kya sunahre KHwab ka ab naqsh-gar koi nahin

toD kar rishton ke bandhan chhoD jate hain sabhi

sath deta hai 'sharafat' umr bhar koi nahin