dard-o-gham se wo bashar aazad hai

dard-o-ġham se vo bashar āzād hai

qalb meñ jis ke ḳhudā kī yaad hai

hukmrān-e-vaqt sab ḳhāmosh haiñ

be-asar mazlūm kī fariyād hai

haq-parasto rab kī nusrat aa.egī

jabr-e-bātil kī bhī ik mī.ād hai

aag nafrat kī bujhe bhī kis tarah

talḳhiyoñ kā ik jahāñ ābād hai

dil hai chhalnī us kā sang-e-buġhz se

jis ke hoñToñ par mubārakbād hai

dekhiye mojid kī āñkhoñ se zarā

ḳhūbsūrat kis qadar ījād hai

ġhālib aa.e ġham kā lashkar kis tarah

dil meñ yād-e-yār jab ābād hai

'ainī' rakhnā rab pe har dam e'timād

varna terī zindagī nāshād hai

dard-o-gham se wo bashar aazad hai

qalb mein jis ke KHuda ki yaad hai

hukmran-e-waqt sab KHamosh hain

be-asar mazlum ki fariyaad hai

haq-parasto rab ki nusrat aaegi

jabr-e-baatil ki bhi ek miad hai

aag nafrat ki bujhe bhi kis tarah

talKHiyon ka ek jahan aabaad hai

dil hai chhalni us ka sang-e-bughz se

jis ke honTon par mubarakbaad hai

dekhiye mojid ki aankhon se zara

KHubsurat kis qadar ijad hai

ghaalib aae gham ka lashkar kis tarah

dil mein yaad-e-yar jab aabaad hai

'aini' rakhna rab pe har dam e'timad

warna teri zindagi nashad hai