dard sanche mein jis ne Dhaala hai

dard sāñche meñ jis ne Dhālā hai

jis ne har ik balā ko Taalā hai

dil sañbhāle nahīñ sañbhaltā thā

us ne kyā ḳhuub dil sañbhālā hai

chain kis tarh mil sakegā tumheñ

tum ne ḳhud ḳhvāhishoñ ko paalā hai

ab maiñ us kī huuñ jo nahīñ merā

dil kā har faisla nirālā hai

jo rag-e-jāñ meñ kal talak thā makīñ

ab hathelī kā merī chhālā hai

jis ko kahte haiñ sab 'adū merā

vo mirī āstīñ kā paalā hai

kaisī jamhūriyat hai ye āḳhir

dekho har ik zabāñ pe taalā hai

jo ba-zid the mujhe harāne par

un kā rusvā.iyoñ se paalā hai

sach to ab sar-nigūñ huā 'naqvī'

jhuuT kā aaj bol-bālā hai

dard sanche mein jis ne Dhaala hai

jis ne har ek bala ko Tala hai

dil sanbhaale nahin sanbhalta tha

us ne kya KHub dil sanbhaala hai

chain kis tarh mil sakega tumhein

tum ne KHud KHwahishon ko pala hai

ab main us ki hun jo nahin mera

dil ka har faisla nirala hai

jo rag-e-jaan mein kal talak tha makin

ab hatheli ka meri chhaala hai

jis ko kahte hain sab 'adu mera

wo meri aastin ka pala hai

kaisi jamhuriyat hai ye aaKHir

dekho har ek zaban pe tala hai

jo ba-zid the mujhe harane par

un ka ruswaiyon se pala hai

sach to ab sar-nigun hua 'naqwi'

jhuT ka aaj bol-baala hai