dard sine mein uThe bhi to dabae rakhna

dard siine meñ uThe bhī to dabā.e rakhnā

ġham-e-hālāt se har lamha nibhā.e rakhnā

apne ehsās ko āñdhī se bachā.e rakhnā

is añdhere meñ koī sham.a jalā.e rakhnā

jaane kab kaun kahāñ tum se sahārā māñge

dard kī dhuup meñ kuchh phuul khilā.e rakhnā

rah-e-ulfat meñ ġham-e-dil kī shikāyat be-sūd

farz hai chaak garebāñ kā chhupā.e rakhnā

dil meñ ik dard uThā baat laboñ par aa.ī

kitnā mushkil hai koī baat bhulā.e rakhnā

ham guzar jā.eñge uḌte hue lamhoñ kī tarah

raah meñ shauq se kāñToñ ko bichhā.e rakhnā

DhūñD tārīk añdheroñ meñ ujāle 'nāshād'

kab talak dard kī duniyā se banā.e rakhnā

dard sine mein uThe bhi to dabae rakhna

gham-e-haalat se har lamha nibhae rakhna

apne ehsas ko aandhi se bachae rakhna

is andhere mein koi shama jalae rakhna

jaane kab kaun kahan tum se sahaara mange

dard ki dhup mein kuchh phul khilae rakhna

rah-e-ulfat mein gham-e-dil ki shikayat be-sud

farz hai chaak gareban ka chhupae rakhna

dil mein ek dard uTha baat labon par aai

kitna mushkil hai koi baat bhulae rakhna

hum guzar jaenge uDte hue lamhon ki tarah

rah mein shauq se kanTon ko bichhae rakhna

DhunD tarik andheron mein ujale 'nashad'

kab talak dard ki duniya se banae rakhna