dard wo tu ne diya jis ka mudawa na hua

dard vo tū ne diyā jis kā mudāvā na huā

terā bīmār masīhā se bhī achchhā na huā

aap hī kahiye ki ye ġhamza-e-be-jā na huā

mujh se parda huā aur ġhair se pardā na huā

be-muravvat na sahī aap magar ye kyā hai

mujh se parda huā aur ġhair se pardā na huā

aap kī sharm bhī duniyā se nirālī niklī

mujh se parda huā aur ġhair se pardā na huā

tū taḌap apnī dikhāne to chalā hai ai dil

aur vo shoḳh agar mahv-e-tamāshā na huā

dekhte hī mujhe barsānā ye patthar kaisā

terā āshiq na huā maiñ koī dīvāna huā

vo shab-e-vasl bhī aa.e to chaḌhā.e tevar

baḳht-bargashta mirā aaj bhī sīdhā na huā

mere hisse kā na saaqī ne bharā jaam ab tak

aur labrez yahāñ umr kā paimāna huā

huur ho is but-e-rā.anā ke muqābil tauba

vā.izo tum ko atā dīda-e-bīnā na huā

hañs paḌā chupke se vo ġhuncha-dahan kuchh kah kar

aisā ye vasl kā va.ada huā goyā na huā

haif-sad-haif ki rahm aa hī gayā qātil ko

na huā shauq-e-shahādat mirā puurā na huā

haath aaya na kabhī vo gul-e-naḳhl-e-ḳhūbī

kabhī sarsabz mirā bāġh-e-tamannā na huā

qābil-e-zikr thī kis din na mirī rusvā.ī

yaar kī bazm meñ kis din mirā charchā na huā

baḳht chamkā na kabhī mere siyah-ḳhāne kā

merā mehmān kabhī vo but-e-rā.anā na huā

aañkh uThā kar bhī na dekhā mire lāshe kī taraf

us sitamgar se itnā bhī to dekhā na huā

chashm-e-sāqī kā tasavvur huā rahbar merā

jab ravāna kabhī maiñ jānib-e-mai-ḳhāna huā

saḳht-jānī ne mirī mujh ko kiyā kyā nādim

hausla yaar kī talvār kā puurā na huā

laakh maarā kiyā sar ḳhanjar-e-qātil 'nashtar'

saḳht-jānī kā mirī baal bhī biikā na huā

dard wo tu ne diya jis ka mudawa na hua

tera bimar masiha se bhi achchha na hua

aap hi kahiye ki ye ghamza-e-be-ja na hua

mujh se parda hua aur ghair se parda na hua

be-murawwat na sahi aap magar ye kya hai

mujh se parda hua aur ghair se parda na hua

aap ki sharm bhi duniya se nirali nikli

mujh se parda hua aur ghair se parda na hua

tu taDap apni dikhane to chala hai ai dil

aur wo shoKH agar mahw-e-tamasha na hua

dekhte hi mujhe barsana ye patthar kaisa

tera aashiq na hua main koi diwana hua

wo shab-e-wasl bhi aae to chaDhae tewar

baKHt-bargashta mera aaj bhi sidha na hua

mere hisse ka na saqi ne bhara jam ab tak

aur labrez yahan umr ka paimana hua

hur ho is but-e-raana ke muqabil tauba

waizo tum ko ata dida-e-bina na hua

hans paDa chupke se wo ghuncha-dahan kuchh kah kar

aisa ye wasl ka wada hua goya na hua

haif-sad-haif ki rahm aa hi gaya qatil ko

na hua shauq-e-shahadat mera pura na hua

hath aaya na kabhi wo gul-e-naKHl-e-KHubi

kabhi sarsabz mera bagh-e-tamanna na hua

qabil-e-zikr thi kis din na meri ruswai

yar ki bazm mein kis din mera charcha na hua

baKHt chamka na kabhi mere siyah-KHane ka

mera mehman kabhi wo but-e-raana na hua

aankh uTha kar bhi na dekha mere lashe ki taraf

us sitamgar se itna bhi to dekha na hua

chashm-e-saqi ka tasawwur hua rahbar mera

jab rawana kabhi main jaanib-e-mai-KHana hua

saKHt-jaani ne meri mujh ko kiya kya nadim

hausla yar ki talwar ka pura na hua

lakh mara kiya sar KHanjar-e-qatil 'nashtar'

saKHt-jaani ka meri baal bhi bika na hua