dariya-e-tirgi mein bikharna paDa mujhe

dariyā-e-tīrgī meñ bikharnā paḌā mujhe

sūraj ke saath saath utarnā paḌā mujhe

do-chār din nigāh kā markaz rahā koī

phir fāsloñ kā faisla karnā paḌā mujhe

kyā jaane kis mizāj ke kitne habīb the

apnī hī āstīn se Darnā paḌā mujhe

āñkhoñ se umr-bhar na mulāqāt ho sakī

be-kār aa.ine meñ sañvarnā paḌā mujhe

ik zindagī ko chhoḌ diyā maut ke liye

ik zindagī ke vāste marnā paḌā mujhe

mīThe samundaroñ ke unhīñ se the silsile

jin khaTTe pāniyoñ meñ Thaharnā paḌā mujhe

ik sach kī aabrū kī hifāzat ke vāste

ḳhud apne aap hī se mukarnā paḌā mujhe

dariya-e-tirgi mein bikharna paDa mujhe

suraj ke sath sath utarna paDa mujhe

do-chaar din nigah ka markaz raha koi

phir faslon ka faisla karna paDa mujhe

kya jaane kis mizaj ke kitne habib the

apni hi aastin se Darna paDa mujhe

aankhon se umr-bhar na mulaqat ho saki

be-kar aaine mein sanwarna paDa mujhe

ek zindagi ko chhoD diya maut ke liye

ek zindagi ke waste marna paDa mujhe

miThe samundaron ke unhin se the silsile

jin khaTTe paniyon mein Thaharna paDa mujhe

ek sach ki aabru ki hifazat ke waste

KHud apne aap hi se mukarna paDa mujhe