dariya kabhi ek haal mein bahta na rahega

dariyā kabhī ik haal meñ bahtā na rahegā

rah jā.ūñgā maiñ aur koī mujh sā na rahegā

aaseb nazar aate haiñ din ko bhī yahāñ par

is shahr meñ ab koī akelā na rahegā

achchhā hai na dekheñge na mahsūs kareñge

āñkheñ na raheñgī to tamāshā na rahegā

vo ḳhaak uḌegī ki na dekhī na sunī ho

dīvāna to kyā chiiz hai sahrā na rahegā

ye anjuman-ārā.ī hai ik raat kī mehmān

tā-sub.h koī dekhne vaalā na rahegā

tū kuchh bhī ho kab tak tujhe ham yaad kareñge

tā-hashr to ye dil bhī dhaḌaktā na rahegā

kyā kyā nazar aatā thā ki maujūd nahīñ hai

ye soch ke rotā huuñ ki kyā kyā na rahegā

āḳhir mire siine ke bhī nāsūr bhareñge

ye baaġh sadā rañg dikhātā na rahegā

huuñ zarra-e-nāchīz mujhe kal kī nahīñ fikr

mash.hūr jo haiñ naam unhī kā na rahegā

'shahzād' bahut ḳhvār kiyā ham-suḳhanī ne

kuchh din dar-o-dīvār se yārāna rahegā

dariya kabhi ek haal mein bahta na rahega

rah jaunga main aur koi mujh sa na rahega

aaseb nazar aate hain din ko bhi yahan par

is shahr mein ab koi akela na rahega

achchha hai na dekhenge na mahsus karenge

aankhen na rahengi to tamasha na rahega

wo KHak uDegi ki na dekhi na suni ho

diwana to kya chiz hai sahra na rahega

ye anjuman-arai hai ek raat ki mehman

ta-subh koi dekhne wala na rahega

tu kuchh bhi ho kab tak tujhe hum yaad karenge

ta-hashr to ye dil bhi dhaDakta na rahega

kya kya nazar aata tha ki maujud nahin hai

ye soch ke rota hun ki kya kya na rahega

aaKHir mere sine ke bhi nasur bharenge

ye bagh sada rang dikhata na rahega

hun zarra-e-nachiz mujhe kal ki nahin fikr

mashhur jo hain nam unhi ka na rahega

'shahzad' bahut KHwar kiya ham-suKHani ne

kuchh din dar-o-diwar se yarana rahega