dariya tha mauj gham thi safina koi na tha

dariyā thā mauj ġham thī safīna koī na thā

tārīk rāste the ujālā koī na thā

phir bhī tumhāre shahr ne rakkhā mirā ḳhayāl

hālāñki merā chāhne vaalā koī na thā

palkoñ pe sab kī bojh hai ik ehtiyāt kā

kal raat mere gaañv meñ soyā koī na thā

sab log chal rahe the saḌak par milā ke haath

dekhā jo ġhaur se to kisī kā koī na thā

māyūs kar diyā thā kisī ke fareb ne

bujhtī huī nigāh meñ chehra koī na thā

andar se ho chuke the bahut muzmahil se log

bāhar se dekhne ko to TuuTā koī na thā

dastak huī thī pahle sī mere makān meñ

bāhar nikal ke aaj bhī dekhā koī na thā

dariya tha mauj gham thi safina koi na tha

tarik raste the ujala koi na tha

phir bhi tumhaare shahr ne rakkha mera KHayal

haalanki mera chahne wala koi na tha

palkon pe sab ki bojh hai ek ehtiyat ka

kal raat mere ganw mein soya koi na tha

sab log chal rahe the saDak par mila ke hath

dekha jo ghaur se to kisi ka koi na tha

mayus kar diya tha kisi ke fareb ne

bujhti hui nigah mein chehra koi na tha

andar se ho chuke the bahut muzmahil se log

bahar se dekhne ko to TuTa koi na tha

dastak hui thi pahle si mere makan mein

bahar nikal ke aaj bhi dekha koi na tha