darmandagon ki aankh se aansu jo Dhal gae

darmāndagoñ kī aañkh se aañsū jo Dhal ga.e

chashme kisī ke lutf-o-karam ke ubal ga.e

Daalī jo us ne ek uchaTtī huī nazar

ḳhasta-dilān-e-rāh-e-mohabbat bahal ga.e

ham aur bārgāh-e-risālat-panāh meñ

maare ḳhushī ke aañkh se aañsū nikal ga.e

pahuñche jo ham dayār-e-madīna meñ sar ke bal

sab apne agle pichhle tasavvur badal ga.e

phir ham the aur rauza-e-aqdas kī jāliyāñ

armān kyā batā.ūñ ki kyā kyā machal ga.e

qurb-e-huzūr dhone lagā dil ke sab uyuub

bātil tasavvurāt the jitne pighal ga.e

nāzāñ hai 'tahniyat' karam-e-kirdgār par

bahke jo the nasīb vo āḳhir sañbhal ga.e

darmandagon ki aankh se aansu jo Dhal gae

chashme kisi ke lutf-o-karam ke ubal gae

Dali jo us ne ek uchaTti hui nazar

KHasta-dilan-e-rah-e-mohabbat bahal gae

hum aur bargah-e-risalat-panah mein

mare KHushi ke aankh se aansu nikal gae

pahunche jo hum dayar-e-madina mein sar ke bal

sab apne agle pichhle tasawwur badal gae

phir hum the aur rauza-e-aqdas ki jaliyan

arman kya bataun ki kya kya machal gae

qurb-e-huzur dhone laga dil ke sab uyub

baatil tasawwuraat the jitne pighal gae

nazan hai 'tahniyat' karam-e-kirdgar par

bahke jo the nasib wo aaKHir sanbhal gae