darmiyan apne ab wo baat nahin

darmiyāñ apne ab vo baat nahīñ

pahle jaise muāmlāt nahīñ

saarī mahfil pe hai nazar terī

merī jānib hī iltifāt nahīñ

ishq lāhaq huā to ho hī gayā

is musībat se ab najāt nahīñ

ahl-e-majlis salāmtī tum par

guftugū merī mujh se baat nahīñ

ai ḳhudā maiñ to bas yahī samjhā

maiñ nahīñ to ye kā.enāt nahīñ

aadmī kī ajiib fitrat hai

rishte haiñ aur ta'alluqāt nahīñ

jaane kis kī duā meñ huuñ shāmil

aaj rāhoñ meñ mushkilāt nahīñ

hai to hai tang rāh-e-umr-e-hayāt

laakh kahiye ki pul-sirāt nahīñ

dastakeñ de ke thak gayā 'āqib'

ab ye dil shahr-e-mumkināt nahīñ

darmiyan apne ab wo baat nahin

pahle jaise muamlat nahin

sari mahfil pe hai nazar teri

meri jaanib hi iltifat nahin

ishq lahaq hua to ho hi gaya

is musibat se ab najat nahin

ahl-e-majlis salamti tum par

guftugu meri mujh se baat nahin

ai KHuda main to bas yahi samjha

main nahin to ye kaenat nahin

aadmi ki ajib fitrat hai

rishte hain aur ta'alluqat nahin

jaane kis ki dua mein hun shamil

aaj rahon mein mushkilat nahin

hai to hai tang rah-e-umr-e-hayat

lakh kahiye ki pul-siraat nahin

dastaken de ke thak gaya 'aqib'

ab ye dil shahr-e-mumkinat nahin