darmiyan fasla nahin hoga

darmiyāñ fāsla nahīñ hogā

ham se shikva-gila nahīñ hogā

umr bhar chāhe us se mil na sakeñ

vo magar bevafā nahīñ hogā

ḳhaak ho jaa.eñ gar tirī ḳhātir

ishq meñ ye burā nahīñ hogā

umr bhar mujh pe jo rahā taarī

kyā mujhe sochtā nahīñ hogā

tum ko sau yaar mil ga.e hoñge

ham sā pāgal milā nahīñ hogā

DhūñDiye to milegī raah na.ī

ek ḳhvāhish se kyā nahīñ hogā

koshisheñ laakh kar ke dekho tum

gar na chāhe ḳhudā nahīñ hogā

yaad aa.egī kuchh dinoñ us kī

phir to ye silsila nahīñ hogā

shahr se gaañv lauTūñ to 'sāhil'

gaañv ab pahle sā nahīñ hogā

darmiyan fasla nahin hoga

hum se shikwa-gila nahin hoga

umr bhar chahe us se mil na saken

wo magar bewafa nahin hoga

KHak ho jaen gar teri KHatir

ishq mein ye bura nahin hoga

umr bhar mujh pe jo raha tari

kya mujhe sochta nahin hoga

tum ko sau yar mil gae honge

hum sa pagal mila nahin hoga

DhunDiye to milegi rah nai

ek KHwahish se kya nahin hoga

koshishen lakh kar ke dekho tum

gar na chahe KHuda nahin hoga

yaad aaegi kuchh dinon us ki

phir to ye silsila nahin hoga

shahr se ganw lauTun to 'sahil'

ganw ab pahle sa nahin hoga