daryaft kar ke KHud ko zamane se dur hun

daryāft kar ke ḳhud ko zamāne se duur huuñ

har shaḳhs bā-shu.ūr hai maiñ be-shu.ūr huuñ

hijrat mirā nasīb hai parvāz mashġhala

gumbad ke dā.ere meñ misāl-e-tuyūr huuñ

gandum kī ḳhushbū raqs meñ rakhtī hai rāt-din

mastī-bharī sharāb ke nashshe meñ chuur huuñ

sadiyoñ se be-libās darīda-badan udaas

tasvīr-e-kā.enāt meñ be-rañg-o-nūr huuñ

bosīda sī kitāb kā ik hāshiya ho tum

lauh-e-azal pe likkhā maiñ bainassutūr huuñ

merā vajūd paanī huā miTTī aur aag

bikhrī huī anā huuñ sulagtā ġhurūr huuñ

fard-e-amal navishta-e-taqdīr paḌh chukā

ḳhāmosh sar jhukā.e ḳhud apne huzūr huuñ

khīñchā nahīñ hisār koī apne ird-gird

'ishrat' maiñ apnī zaat meñ tanhā zarūr huuñ

daryaft kar ke KHud ko zamane se dur hun

har shaKHs ba-shuur hai main be-shuur hun

hijrat mera nasib hai parwaz mashghala

gumbad ke daere mein misal-e-tuyur hun

gandum ki KHushbu raqs mein rakhti hai raat-din

masti-bhari sharab ke nashshe mein chur hun

sadiyon se be-libas darida-badan udas

taswir-e-kaenat mein be-rang-o-nur hun

bosida si kitab ka ek hashiya ho tum

lauh-e-azal pe likkha main bainassutur hun

mera wajud pani hua miTTi aur aag

bikhri hui ana hun sulagta ghurur hun

fard-e-amal nawishta-e-taqdir paDh chuka

KHamosh sar jhukae KHud apne huzur hun

khincha nahin hisar koi apne ird-gird

'ishrat' main apni zat mein tanha zarur hun