dasht-e-be-nawai mein faKHr-e-kaj-kulahi kya

dasht-e-be-navā.ī meñ faḳhr-e-kaj-kulāhī kyā

maut kī fasīloñ par zo'm-e-bādshāhī kyā

dard kī salīboñ par laash ho chuke naale

be-zamīr hākim ko 'adl kī gavāhī kyā

jo asīr-e-vahshat bhī raat ke musāfir the

aise shab-gazīdoñ par niiñd ke sipāhī kyā

'adl ke varaq phāḌe maktab-e-siyāsat ne

phir gunāh kyā terā merī be-gunāhī kyā

ehtisāb-e-dil kā jab har hisāb chuktā hai

terī kam-nigāhī kyā merī ḳhush-nigāhī kyā

ham umīd-e-fardā ke rahravān-e-manzil haiñ

sub.h ke ujāloñ ko raat kī siyāhī kyā

be-kafan umīdoñ kī sar-burīda lāshoñ ko

dafn kar ke lauT aa.e rāstī ke raahī kyā

ai 'ġhazal' tirī āñkheñ ġham-zada haiñ rātoñ meñ

ratjagoñ ke mausam meñ ḳhvāb-e-sub.h-gāhī kyā

dasht-e-be-nawai mein faKHr-e-kaj-kulahi kya

maut ki fasilon par zo'm-e-baadshahi kya

dard ki salibon par lash ho chuke nale

be-zamir hakim ko 'adl ki gawahi kya

jo asir-e-wahshat bhi raat ke musafir the

aise shab-gazidon par nind ke sipahi kya

'adl ke waraq phaDe maktab-e-siyasat ne

phir gunah kya tera meri be-gunahi kya

ehtisab-e-dil ka jab har hisab chukta hai

teri kam-nigahi kya meri KHush-nigahi kya

hum umid-e-farda ke rahrawan-e-manzil hain

subh ke ujalon ko raat ki siyahi kya

be-kafan umidon ki sar-burida lashon ko

dafn kar ke lauT aae rasti ke rahi kya

ai 'ghazal' teri aankhen gham-zada hain raaton mein

ratjagon ke mausam mein KHwab-e-subh-gahi kya