dasht-e-nadida se phir rabt baDhane lage hum

dasht-e-nādīda se phir rabt baḌhāne lage ham

dil hī dil meñ sahī kuchh ḳhaak uḌāne lage ham

pahr do pahr ko vo 'ishq thā ik 'umr kā 'ishq

aa.ina dekhā to kuchh itne purāne lage ham

kahīñ zanjīr kā ye halqa izāfī hī na ho

dekh is ḳhvāb se aage nazar aane lage ham

mas.ala bāġh-e-mohabbat kā vo pahlā sā nahīñ

gul khilāne kī jo thī shart uThāne lage ham

bahte bahte unhīñ āñkhoñ meñ kahīñ Duub ga.e

chaliye achchhā hai kisī taur Thikāne lage ham

baat tasvīr ne kah dī ki jo matlab kī na thī

yak-ba-yak manzar-e-jāñ chhoḌ ke jaane lage ham

dasht-e-nadida se phir rabt baDhane lage hum

dil hi dil mein sahi kuchh KHak uDane lage hum

pahr do pahr ko wo 'ishq tha ek 'umr ka 'ishq

aaina dekha to kuchh itne purane lage hum

kahin zanjir ka ye halqa izafi hi na ho

dekh is KHwab se aage nazar aane lage hum

masala bagh-e-mohabbat ka wo pahla sa nahin

gul khilane ki jo thi shart uThane lage hum

bahte bahte unhin aankhon mein kahin Dub gae

chaliye achchha hai kisi taur Thikane lage hum

baat taswir ne kah di ki jo matlab ki na thi

yak-ba-yak manzar-e-jaan chhoD ke jaane lage hum