dasht-e-tabir mein aankhon ko jalane ke liye

dasht-e-tā'bīr meñ āñkhoñ ko jalāne ke liye

raat aa.ī thī hameñ ḳhvāb dikhāne ke liye

din ko har gaam pe vo saath thā saa.e kī tarah

shaam aate hī hameñ chhoḌ ke jaane ke liye

yaad karnā bhī ḳhatā yaad na karnā bhī ḳhatā

ham to jiite rahe ilzām uThāne ke liye

jaane kyoñ dasht-e-tamannā meñ bahār aa pahuñchī

ham hī kyā kam the yahāñ ḳhaak uḌāne ke liye

chashm-e-vīrāñ kā bhalā kis se mudāvā hotā

tum hī aa jaate kabhī ham ko rulāne ke liye

shahr-e-dil tund havāoñ kā hai maskan 'rāshid'

kaun aa.egā yahāñ sham' jalāne ke liye

dasht-e-ta'bir mein aankhon ko jalane ke liye

raat aai thi hamein KHwab dikhane ke liye

din ko har gam pe wo sath tha sae ki tarah

sham aate hi hamein chhoD ke jaane ke liye

yaad karna bhi KHata yaad na karna bhi KHata

hum to jite rahe ilzam uThane ke liye

jaane kyon dasht-e-tamanna mein bahaar aa pahunchi

hum hi kya kam the yahan KHak uDane ke liye

chashm-e-viran ka bhala kis se mudawa hota

tum hi aa jate kabhi hum ko rulane ke liye

shahr-e-dil tund hawaon ka hai maskan 'rashid'

kaun aaega yahan sham' jalane ke liye