dasht-e-taKHayyulat mein jab bhi safar hua

dasht-e-taḳhayyulāt meñ jab bhī safar huā

jaane kahāñ kahāñ se hamārā guzar huā

logo kī talḳhiyoñ kā kuchh aisā asar huā

dil ke har ek goshe meñ raqs-e-sharar huā

us kī taraf se maiñ to huā be-ḳhabar magar

merī taraf se vo na kabhī be-ḳhabar huā

bigḌī hai aisī shakl havādis kī maar se

hairān aa.ina bhī mujhe dekh kar huā

ik baar hī to kāñdhe pe rakkhā thā us ne sar

phir aisā ittifāq kahāñ 'umr bhar huā

jis kī nazar meñ vus.at-e-ḳhvāb-o-ḳhayāl thī

us kā vujūd markaz-e-ahl-e-nazar huā

pahle to ik makān kī sūrat hī thā faqat

tashrīf aap laa.e to ghar merā ghar huā

us ko hamārī dasht-navardī se hai ḳhushī

is se ġharaz nahīñ ki koī dar-ba-dar huā

sab kī samajh meñ aatā kahāñ hai ye 'ilm-o-fan

jis ne samajh liyā use vo dīda-var huā

'rahbar' tavīl 'umr bhī jiine se faiz kyā

kuchh maqsad-e-hayāt na puurā agar huā

dasht-e-taKHayyulat mein jab bhi safar hua

jaane kahan kahan se hamara guzar hua

logo ki talKHiyon ka kuchh aisa asar hua

dil ke har ek goshe mein raqs-e-sharar hua

us ki taraf se main to hua be-KHabar magar

meri taraf se wo na kabhi be-KHabar hua

bigDi hai aisi shakl hawadis ki mar se

hairan aaina bhi mujhe dekh kar hua

ek bar hi to kandhe pe rakkha tha us ne sar

phir aisa ittifaq kahan 'umr bhar hua

jis ki nazar mein wusat-e-KHwab-o-KHayal thi

us ka wujud markaz-e-ahl-e-nazar hua

pahle to ek makan ki surat hi tha faqat

tashrif aap lae to ghar mera ghar hua

us ko hamari dasht-nawardi se hai KHushi

is se gharaz nahin ki koi dar-ba-dar hua

sab ki samajh mein aata kahan hai ye 'ilm-o-fan

jis ne samajh liya use wo dida-war hua

'rahbar' tawil 'umr bhi jine se faiz kya

kuchh maqsad-e-hayat na pura agar hua