dasht-e-ummid mein KHwabon ka safar karna tha

dasht-e-ummīd meñ ḳhvāboñ kā safar karnā thā

tū ki ik lamha-e-nāpaid basar karnā thā

ham ne kyuuñ aapsī azdād ke nukte DhūñDe?

ham ne to ḳhud ko baham shīr-o-shakar karnā thā

naqsh bantā hī nahīñ sañg-e-samā.at pe koī

kund alfāz ko phir tīr-o-tabar karnā thā

sā.at-e-dard ki be-chehra o be-nām rahī

qatra-e-ashk ki mahfūz guhar karnā thā

tishnagī māhī-e-be-āb sī likh hoñToñ par

varna yuuñ bosa-e-sāġhar se hazar karnā thā

mujh pe aayat na koī lafz hī utrā 'ahmad'

merī mushkil ki bayāñ mujh ko safar karnā thā

dasht-e-ummid mein KHwabon ka safar karna tha

tu ki ek lamha-e-napaid basar karna tha

hum ne kyun aapsi azdad ke nukte DhunDe?

hum ne to KHud ko baham shir-o-shakar karna tha

naqsh banta hi nahin sang-e-samaat pe koi

kund alfaz ko phir tir-o-tabar karna tha

saat-e-dard ki be-chehra o be-nam rahi

qatra-e-ashk ki mahfuz guhar karna tha

tishnagi mahi-e-be-ab si likh honTon par

warna yun bosa-e-saghar se hazar karna tha

mujh pe aayat na koi lafz hi utra 'ahmad'

meri mushkil ki bayan mujh ko safar karna tha