dasht hai kaun-o-makan aur la-makan

dasht hai kaun-o-makāñ aur lā-makāñ

duur tak vahm-o-gumāñ aur lā-makāñ

ibtidā na intihā na rāsta

maiñ abad ke darmiyāñ aur lā-makāñ

ek dhaḌkā ḳhaak meñ Daalā huā

ek sa’i-e-rā.egāñ aur lā-makāñ

jal-bujhā hai aag meñ merā paḌāo

chār-sū merā dhuāñ aur lā-makāñ

ik zamīn-e-be-yaqīnī mere saath

ik gumān-e-lā-gumāñ aur lā-makāñ

ek sahrā zaat se aage kahīñ

ek hijrat darmiyāñ aur lā-makāñ

bādaloñ meñ gum hue jaate haiñ sab

kārvāñ-dar-kārvāñ aur lā-makāñ

ek sayyāra mire raste meñ hai

varna maiñ thā āsmāñ aur lā-makāñ

dasht hai kaun-o-makan aur la-makan

dur tak wahm-o-guman aur la-makan

ibtida na intiha na rasta

main abad ke darmiyan aur la-makan

ek dhaDka KHak mein Dala hua

ek sa’i-e-raegan aur la-makan

jal-bujha hai aag mein mera paDao

chaar-su mera dhuan aur la-makan

ek zamin-e-be-yaqini mere sath

ek guman-e-la-guman aur la-makan

ek sahra zat se aage kahin

ek hijrat darmiyan aur la-makan

baadalon mein gum hue jate hain sab

karwan-dar-karwan aur la-makan

ek sayyara mere raste mein hai

warna main tha aasman aur la-makan