dasht mein chhanw koi DhunD nikali jae

dasht meñ chhāñv koī DhūñD nikālī jaa.e

apnī hī zaat kī dīvār banā lī jaa.e

ye to mumkin hai ki dīvār girā deñ lekin

kaise girtī huī dīvār sambhālī jaa.e

DhūñDhnā hogā ḳhad-o-ḳhāl kī duniyā meñ jise

pahle us shaḳhs kī tasvīr banā lī jaa.e

dil ho faiyyaz to bas ek hī dar kaafī hai

kyā zarūrī hai ki har dar pe savālī jaa.e

tum jo bole to milī zauq-e-anā ko taskīn

mujh ko Dar thā mirī āvāz na ḳhālī jaa.e

likh to deñ har dar-o-dīvār pe 'ābid' lekin

baat aisī hai ki siine meñ chhupā lī jaa.e

dasht mein chhanw koi DhunD nikali jae

apni hi zat ki diwar bana li jae

ye to mumkin hai ki diwar gira den lekin

kaise girti hui diwar sambhaali jae

DhunDhna hoga KHad-o-KHal ki duniya mein jise

pahle us shaKHs ki taswir bana li jae

dil ho faiyyaz to bas ek hi dar kafi hai

kya zaruri hai ki har dar pe sawali jae

tum jo bole to mili zauq-e-ana ko taskin

mujh ko Dar tha meri aawaz na KHali jae

likh to den har dar-o-diwar pe 'abid' lekin

baat aisi hai ki sine mein chhupa li jae