dasht mein hai ek naqsh-e-rahguzar sab se alag

dasht meñ hai ek naqsh-e-rahguzar sab se alag

ham meñ hai shāyad koī mahv-e-safar sab se alag

chalte chalte vo bhī āḳhir bhiiḌ meñ gum ho gayā

vo jo har sūrat meñ aatā thā nazar sab se alag

sab kī apnī manzileñ thiiñ sab ke apne rāste

ek āvāra phire ham dar-ba-dar sab se alag

hai rah-o-rasm-e-zamāna parda-e-be-gāngī

darmiyāñ rahtā huuñ maiñ sab ke magar sab se alag

de ke aadat rañj kī hotā hai mujh par mehrbāñ

us sitamgar ne ye sīkhā hai hunar sab se alag

shahr-e-kasrat meñ ajab ik rauzan-e-ḳhalvat khulā

us ne jo dekhā mujhe ik lamha bhar sab se alag

har koī shāmil huā 'sarmad' julūs-e-ām meñ

muñh uThā.e chal diyā hai tū kidhar sab se alag

dasht mein hai ek naqsh-e-rahguzar sab se alag

hum mein hai shayad koi mahw-e-safar sab se alag

chalte chalte wo bhi aaKHir bhiD mein gum ho gaya

wo jo har surat mein aata tha nazar sab se alag

sab ki apni manzilen thin sab ke apne raste

ek aawara phire hum dar-ba-dar sab se alag

hai rah-o-rasm-e-zamana parda-e-be-gangi

darmiyan rahta hun main sab ke magar sab se alag

de ke aadat ranj ki hota hai mujh par mehrban

us sitamgar ne ye sikha hai hunar sab se alag

shahr-e-kasrat mein ajab ek rauzan-e-KHalwat khula

us ne jo dekha mujhe ek lamha bhar sab se alag

har koi shamil hua 'sarmad' julus-e-am mein

munh uThae chal diya hai tu kidhar sab se alag