dasht mein phul ugane ka hunar jaanta hun

dasht meñ phuul ugāne kā hunar jāntā huuñ

yā'nī maiñ she'r sunāne kā hunar jāntā huuñ

ik tirī baat banā.e nahīñ bantī mujh se

varna har baat banāne kā hunar jāntā huuñ

tere kūche meñ jo ā.ūñgā Thahar jā.ūñgā

kab yahāñ aan ke jaane kā hunar jāntā huuñ

haañ ḳhabar-dār ki ai nāzish-e-ḳhūbān-e-chaman

maiñ hasīnoñ ko lubhāne kā hunar jāntā huuñ

aañkh se aañkh laḌā dene kā Dhab aatā hai

hoñT se hoñT milāne kā hunar jāntā huuñ

mere lafzoñ meñ vo garmī hai ki jis se 'kāzim'

aag paanī meñ lagāne kā hunar jāntā huuñ

dasht mein phul ugane ka hunar jaanta hun

ya'ni main she'r sunane ka hunar jaanta hun

ek teri baat banae nahin banti mujh se

warna har baat banane ka hunar jaanta hun

tere kuche mein jo aaunga Thahar jaunga

kab yahan aan ke jaane ka hunar jaanta hun

han KHabar-dar ki ai nazish-e-KHuban-e-chaman

main hasinon ko lubhane ka hunar jaanta hun

aankh se aankh laDa dene ka Dhab aata hai

honT se honT milane ka hunar jaanta hun

mere lafzon mein wo garmi hai ki jis se 'kazim'

aag pani mein lagane ka hunar jaanta hun