dast-e-junun mein daman-e-gul ko lane ki tadbir karen

dast-e-junūñ meñ dāman-e-gul ko laane kī tadbīr kareñ

narm havā ke jhoñko aao mausam ko zanjīr kareñ

mausam-e-abr-o-bād se pochheñ lazzat-e-sozāñ kā mafhūm

mauja-e-ḳhūñ se dāman-e-gul par harf-e-junūñ tahrīr kareñ

āmad-e-gul kā vīrānī bhī dekh rahī hai kyā kyā ḳhvāb

vīrānī ke ḳhvāb ko aao vahshat se ta.abīr kareñ

raat ke jaage sub.h kī halkī narm havā meñ so.e haiñ

dekheñ kab tak niiñd ke maate uThne meñ tāḳhīr kareñ

tanhā.ī meñ kāhish-e-jāñ ke hāthoñ kis ārām se haiñ

kaise apne naaz uThā.eñ kyā apnī tahqīr kareñ

betābī to ḳhair rahegī betābī kī baat nahīñ

marnā itnā sahl nahīñ hai jiine kī tadbīr kareñ

ghuum rahe haiñ dasht-e-junūñ meñ un ke kyā kyā ruup 'jamīl'

kis ko dekheñ kis ko chhoḌeñ kis ko jā ke asiir kareñ

dast-e-junun mein daman-e-gul ko lane ki tadbir karen

narm hawa ke jhonko aao mausam ko zanjir karen

mausam-e-abr-o-baad se pochhen lazzat-e-sozan ka mafhum

mauja-e-KHun se daman-e-gul par harf-e-junun tahrir karen

aamad-e-gul ka virani bhi dekh rahi hai kya kya KHwab

virani ke KHwab ko aao wahshat se tabir karen

raat ke jage subh ki halki narm hawa mein soe hain

dekhen kab tak nind ke mate uThne mein taKHir karen

tanhai mein kahish-e-jaan ke hathon kis aaram se hain

kaise apne naz uThaen kya apni tahqir karen

betabi to KHair rahegi betabi ki baat nahin

marna itna sahl nahin hai jine ki tadbir karen

ghum rahe hain dasht-e-junun mein un ke kya kya rup 'jamil'

kis ko dekhen kis ko chhoDen kis ko ja ke asir karen