dast-e-KHulus jin ki taraf hum baDha gae

dast-e-ḳhulūs jin kī taraf ham baḌhā ga.e

ḳhanjar-ba-kaf vahī saf-e-qātil meñ aa ga.e

āñkhoñ se dil kī pyaas jo aañsū bahā ga.ī

har buuñd meñ hazār samundar samā ga.e

bādal baras baras ke shab-o-roz har taraf

nairangī-e-hayāt kī fasloñ ko khā ga.e

paayā faroġh aag ne bārish kī oT meñ

sho.ale munāfarat ke rifāqat jalā ga.e

gahre samundaroñ se jinheñ thiiñ shikāyateñ

jū-e-kam-āb meñ vahī kashtī chalā ga.e

āñkhoñ ko bāt-chīt ke ādāb de ke ham

gūñgī zabāñ se dil kī hikāyat sunā ga.e

'nādim' basant aa.ī to dekhā ye khet meñ

sarsoñ ke phuul raa.ī kā parbat ugā ga.e

dast-e-KHulus jin ki taraf hum baDha gae

KHanjar-ba-kaf wahi saf-e-qatil mein aa gae

aankhon se dil ki pyas jo aansu baha gai

har bund mein hazar samundar sama gae

baadal baras baras ke shab-o-roz har taraf

nairangi-e-hayat ki faslon ko kha gae

paya farogh aag ne barish ki oT mein

shoale munafarat ke rifaqat jala gae

gahre samundaron se jinhen thin shikayaten

ju-e-kam-ab mein wahi kashti chala gae

aankhon ko baat-chit ke aadab de ke hum

gungi zaban se dil ki hikayat suna gae

'nadim' basant aai to dekha ye khet mein

sarson ke phul rai ka parbat uga gae