dast-e-pur-shauq mile sab ko ye dastur nahin

dast-e-pur-shauq mile sab ko ye dastūr nahīñ

ḳhaar se varna yahāñ dāman-e-gul duur nahīñ

ishq bhī hāmil-e-āyāt-e-mohabbat na rahā

chashm-e-pur-āb nahīñ zaḳhm se dil chuur nahīñ

marg-e-ālim ko kahā jaatā hai marg-e-ālam

maut taarī hai zamāne pe jo mansūr nahīñ

haath hai ik pas-e-parda mirā dāman thāme

kabhī majbūr huuñ maiñ aur kabhī majbūr nahīñ

nuur tāroñ kā bujhā de na mirī ham-bazmī

mujh se zulmat mire saa.e kī tarah duur nahīñ

'mānī' ālām se ye kah ke chhuḌāyā dāman

merī qismat hai vahī jo unheñ manzūr nahīñ

dast-e-pur-shauq mile sab ko ye dastur nahin

KHar se warna yahan daman-e-gul dur nahin

ishq bhi hamil-e-ayat-e-mohabbat na raha

chashm-e-pur-ab nahin zaKHm se dil chur nahin

marg-e-alim ko kaha jata hai marg-e-alam

maut tari hai zamane pe jo mansur nahin

hath hai ek pas-e-parda mera daman thame

kabhi majbur hun main aur kabhi majbur nahin

nur taron ka bujha de na meri ham-bazmi

mujh se zulmat mere sae ki tarah dur nahin

'mani' aalam se ye kah ke chhuDaya daman

meri qismat hai wahi jo unhen manzur nahin