dast-e-qatil mein ye shamshir kahan se aai

dast-e-qātil meñ ye shamshīr kahāñ se aa.ī

naaz kartī mirī taqdīr kahāñ se aa.ī

chāndnī siine meñ utrī hī chalī jaatī hai

chāñd meñ aap kī tasvīr kahāñ se aa.ī

apnī palkoñ pe sajā laa.ī hai kis ke jalve

zindagī tujh meñ ye tanvīr kahāñ se aa.ī

ho na ho us meñ chaman vāloñ kī sāzish hai koī

phuul ke haath meñ shamshīr kahāñ se aa.ī

ḳhvāb to ḳhair ham us bazm se le aa.e the

lekin is ḳhvāb kī tābīr kahāñ se aa.ī

ḳhūn-e-hasrat hai kahāñ aur ye ezaaz kahāñ

ai hinā tujh meñ ye tauqīr kahāñ se aa.ī

dil se ik aah to niklī hai shakīla baano

lekin is aah meñ tāsīr kahāñ se aa.ī

dast-e-qatil mein ye shamshir kahan se aai

naz karti meri taqdir kahan se aai

chandni sine mein utri hi chali jati hai

chand mein aap ki taswir kahan se aai

apni palkon pe saja lai hai kis ke jalwe

zindagi tujh mein ye tanwir kahan se aai

ho na ho us mein chaman walon ki sazish hai koi

phul ke hath mein shamshir kahan se aai

KHwab to KHair hum us bazm se le aae the

lekin is KHwab ki tabir kahan se aai

KHun-e-hasrat hai kahan aur ye ezaz kahan

ai hina tujh mein ye tauqir kahan se aai

dil se ek aah to nikli hai shakila bano

lekin is aah mein tasir kahan se aai