dast-e-rahat ne kabhi ranj-e-giran-bari ne

dast-e-rāhat ne kabhī rañj-e-girāñ-bārī ne

kar diyā ḳhatm mujhe ishq kī bīmārī ne

raas aa.ī hai na aa.egī ye duniyā lekin

rok rakkhā hai mujhe kuuch kī tayyārī ne

harf us paikar-e-gul par na thā aane vaalā

us ko sharminda kiyā rasm-e-dil-āzārī ne

yūñhī ḳhushbū se mo.attar nahīñ sāñseñ merī

zulf lahrā.ī hai āñgan meñ kisī pyārī ne

haath kyā aa.egā ab jañg ko jaarī rakh kar

faisla kar bhī diyā shah kī giraftārī ne

qarya-e-ḳhāk se nisbat kī thī ḳhvāhish kis ko

mujh ko zanjīr kiyā us kī taraf-dārī ne

ḳhush nahīñ aayā mujhe bāġh-e-adan bhī 'sājid'

maar Daalā hai mujhe phir mirī hushyārī ne

dast-e-rahat ne kabhi ranj-e-giran-bari ne

kar diya KHatm mujhe ishq ki bimari ne

ras aai hai na aaegi ye duniya lekin

rok rakkha hai mujhe kuch ki tayyari ne

harf us paikar-e-gul par na tha aane wala

us ko sharminda kiya rasm-e-dil-azari ne

yunhi KHushbu se moattar nahin sansen meri

zulf lahrai hai aangan mein kisi pyari ne

hath kya aaega ab jang ko jari rakh kar

faisla kar bhi diya shah ki giraftari ne

qarya-e-KHak se nisbat ki thi KHwahish kis ko

mujh ko zanjir kiya us ki taraf-dari ne

KHush nahin aaya mujhe bagh-e-adan bhi 'sajid'

mar Dala hai mujhe phir meri hushyari ne