dast-e-ulfat baDh gae main un ka shaida ho gaya

dast-e-ulfat baḌh ga.e maiñ un kā shaidā ho gayā

hijr kā ġham is qadar khāyā ki haiza ho gayā

ham the m a paas interview meñ phir bhī rah ga.e

matric lekin minister kā navāsā ho gayā

vo samajhtā thā adā hai ho agar tirchhī nigāh

mashq kī itnī ki āḳhir vo paTankhā ho gayā

dekhtā thā muñh rahā jis vaqt tak ye aa.ina

ab dil-e-sad-chāk merā un kā kanghā ho gayā

tiir ulfat kā kahīñ puurā kahīñ aadhā lagā

koī andhā ho gayā aur koī kaanā ho gayā

qais ko thā ishq phir lailā ko ulfat ho ga.ī

ibtidā meñ nar jo thā āḳhir vo maada ho gayā

kañTh maalā us ke niklā ho gayā vo talḳh-kām

jo ki mīThā aam thā kaḌvā karailā ho gayā

yaad aaya jabki majnūñ thā kabhī lambī khajūr

yā vo din hai suukh kar bilkul chhuārā ho gayā

dast-e-ulfat baDh gae main un ka shaida ho gaya

hijr ka gham is qadar khaya ki haiza ho gaya

hum the m a pas interwiew mein phir bhi rah gae

matric lekin minister ka nawasa ho gaya

wo samajhta tha ada hai ho agar tirchhi nigah

mashq ki itni ki aaKHir wo paTankha ho gaya

dekhta tha munh raha jis waqt tak ye aaina

ab dil-e-sad-chaak mera un ka kangha ho gaya

tir ulfat ka kahin pura kahin aadha laga

koi andha ho gaya aur koi kana ho gaya

qais ko tha ishq phir laila ko ulfat ho gai

ibtida mein nar jo tha aaKHir wo mada ho gaya

kanTh mala us ke nikla ho gaya wo talKH-kaam

jo ki miTha aam tha kaDwa karaila ho gaya

yaad aaya jabki majnun tha kabhi lambi khajur

ya wo din hai sukh kar bilkul chhuara ho gaya