dast-e-wahshat mein gareban sa hun

dast-e-vahshat meñ garebān sā huuñ

kuchh dinoñ se maiñ pareshān sā huuñ

kah rahā hai ye tirā husn-o-jamāl

'ġhālib'-o-'mīr' kā dīvān sā huuñ

aur kuchh der mire saath raho

aur kuchh der kā mehmān sā huuñ

ruuh kahtī hai ki ilzām na de

jism kahtā hai ki be-jān sā huuñ

sūrateñ dekh rahā huuñ 'nashtar'

misl-e-ā.īna huuñ hairān sā huuñ

dast-e-wahshat mein gareban sa hun

kuchh dinon se main pareshan sa hun

kah raha hai ye tera husn-o-jamal

'ghaalib'-o-'mir' ka diwan sa hun

aur kuchh der mere sath raho

aur kuchh der ka mehman sa hun

ruh kahti hai ki ilzam na de

jism kahta hai ki be-jaan sa hun

suraten dekh raha hun 'nashtar'

misl-e-aina hun hairan sa hun