dastar-e-ehtiyat bacha kar na aaega

dastār-e-ehtiyāt bachā kar na aa.egā

koī bhī us galī se subuk-sar na aa.egā

bas ek jast aur sar-e-kū-e-justujū

phir rāste meñ koī samundar na aa.egā

uḌ jā.eñge havā meñ sabhī naqsh-e-nā-tamām

aur mausam-e-hunar bhī palaT kar na aa.egā

kab tak rahoge zid ke ahāte meñ ḳhema-zan

vo hadd-e-ehtiyāt se bāhar na aa.egā

yuuñ mutma.in haiñ rāste sehn-e-sukūt ke

jaise kabhī sadāoñ kā lashkar na aa.egā

jo kuchh hai vo bahut hai ki phir is navāh meñ

ik lamha-e-sukūñ bhī mayassar na aa.egā

'aḳhtar' ab intizār kī parchhā.iyāñ sameT

is dhuup meñ vo mom kā paikar na aa.egā

dastar-e-ehtiyat bacha kar na aaega

koi bhi us gali se subuk-sar na aaega

bas ek jast aur sar-e-ku-e-justuju

phir raste mein koi samundar na aaega

uD jaenge hawa mein sabhi naqsh-e-na-tamam

aur mausam-e-hunar bhi palaT kar na aaega

kab tak rahoge zid ke ahate mein KHema-zan

wo hadd-e-ehtiyat se bahar na aaega

yun mutmain hain raste sehn-e-sukut ke

jaise kabhi sadaon ka lashkar na aaega

jo kuchh hai wo bahut hai ki phir is nawah mein

ek lamha-e-sukun bhi mayassar na aaega

'aKHtar' ab intizar ki parchhaiyan sameT

is dhup mein wo mom ka paikar na aaega