dastak si ye kya thi koi saya hai ki main hun

dastak sī ye kyā thī koī saayā hai ki maiñ huuñ

ik shaḳhs mirī tarah kā aayā hai ki maiñ huuñ

sab jaisā huuñ lekin mire tasvīr-garoñ ne

chehra mirā is ruḳh se banāyā hai ki maiñ huuñ

kyā niiñd thī vo apne na hone ke nashe kī

kyuuñ ye mire hone ne batāyā hai ki maiñ huuñ

maiñ huuñ ki haiñ maujūd mire dekhne vaale

ḳhud mujh ko to kam kam nazar aayā hai ki maiñ huuñ

maiñ huuñ so ye ḳhushbū tirī aatī rahī mujh se

kuchh tere bhī hone se sujhāyā hai ki maiñ huuñ

maiñ is meñ magan vahm hai yā ḳhvāb hai hastī

logoñ ne magar daam bichhāyā hai ki maiñ huuñ

dekhūñ to mire aks se kyā kahtā hai dariyā

pal-bhar ko to lahroñ ne batāyā hai ki maiñ huuñ

kuchh rañg lagā.e bhī haiñ tasvīr-garoñ ne

yā hañs ke ye kāġhaz hī uḌāyā hai ki maiñ huuñ

kuchh kam to nahīñ ye mire hone kī gumrāhī

is jurm meñ kis kis ne satāyā hai ki maiñ huuñ

dastak si ye kya thi koi saya hai ki main hun

ek shaKHs meri tarah ka aaya hai ki main hun

sab jaisa hun lekin mere taswir-garon ne

chehra mera is ruKH se banaya hai ki main hun

kya nind thi wo apne na hone ke nashe ki

kyun ye mere hone ne bataya hai ki main hun

main hun ki hain maujud mere dekhne wale

KHud mujh ko to kam kam nazar aaya hai ki main hun

main hun so ye KHushbu teri aati rahi mujh se

kuchh tere bhi hone se sujhaya hai ki main hun

main is mein magan wahm hai ya KHwab hai hasti

logon ne magar dam bichhaya hai ki main hun

dekhun to mere aks se kya kahta hai dariya

pal-bhar ko to lahron ne bataya hai ki main hun

kuchh rang lagae bhi hain taswir-garon ne

ya hans ke ye kaghaz hi uDaya hai ki main hun

kuchh kam to nahin ye mere hone ki gumrahi

is jurm mein kis kis ne sataya hai ki main hun