dastaras chhin jaegi aur naqsh-e-pa kho jaenge

dastaras chhin jā.egī aur naqsh-e-pā kho jā.eñge

ham vahāñ par baiThe baiThe ret ke ho jā.eñge

kab se marnā chāhte haiñ tujh pe ham terī qasam

jaan se to jā rahe haiñ jaan mar to jā.eñge

vo nahīñ samjheñge lailā kaun hai maiñ kaun huuñ

bas zarā sahrā taraf jaanā hai pūchho jā.eñge

ik kahānī sunte sunte itnā 'arsa ho gayā

ab agar vo dikh gayā to andhe hī ho jā.eñge

ye jo tāroñ kā fusūñ hai TūTnā hai sub.h ko

jab tirī āñkhoñ se ham bhī Tuut kar kho jā.eñge

aap agar ḳhud se muḳhātib haiñ to 'āmir' Thiik hai

aap kī bātoñ ko sun kar log to so jā.eñge

dastaras chhin jaegi aur naqsh-e-pa kho jaenge

hum wahan par baiThe baiThe ret ke ho jaenge

kab se marna chahte hain tujh pe hum teri qasam

jaan se to ja rahe hain jaan mar to jaenge

wo nahin samjhenge laila kaun hai main kaun hun

bas zara sahra taraf jaana hai puchho jaenge

ek kahani sunte sunte itna 'arsa ho gaya

ab agar wo dikh gaya to andhe hi ho jaenge

ye jo taron ka fusun hai TuTna hai subh ko

jab teri aankhon se hum bhi Tut kar kho jaenge

aap agar KHud se muKHatib hain to 'amir' Thik hai

aap ki baaton ko sun kar log to so jaenge