daulat mere pichhe na sharafat mere aage

daulat mire pīchhe na sharāfat mire aage

chaltā hai mirā sāya-e-vahshat mire aage

qudrat ne banāyā hai mujhe aisā bayābāñ

uḌ jaatī hai sahrāoñ kī rañgat mire aage

dushman kī nazar aatā huuñ maiñ jaan kā apnī

phīkī hai raqīboñ kī raqābat mire aage

kuchh karne nahīñ detī mirī kāhilī mujh ko

be-kār paḌī rahtī hai fursat mire aage

kuchh khoyā huā hai jo kisī ko nahīñ miltā

phirte haiñ pareshāñ qad-o-qāmat mire aage

jab se ye khulā mujh pe ki maiñ huuñ nahīñ kuchh

tab se na jahannum hai na jannat mire aage

hijrat kā ka.ī baar kiyā maiñ ne irāda

har baat 'shakīl' aa gayā bhārat mire aage

daulat mere pichhe na sharafat mere aage

chalta hai mera saya-e-wahshat mere aage

qudrat ne banaya hai mujhe aisa bayaban

uD jati hai sahraon ki rangat mere aage

dushman ki nazar aata hun main jaan ka apni

phiki hai raqibon ki raqabat mere aage

kuchh karne nahin deti meri kahili mujh ko

be-kar paDi rahti hai fursat mere aage

kuchh khoya hua hai jo kisi ko nahin milta

phirte hain pareshan qad-o-qamat mere aage

jab se ye khula mujh pe ki main hun nahin kuchh

tab se na jahannum hai na jannat mere aage

hijrat ka kai bar kiya main ne irada

har baat 'shakil' aa gaya bhaarat mere aage