dawa asar nahin rakhti dua qubul nahin

davā asar nahīñ rakhtī duā qubūl nahīñ

ye kaise log haiñ jin ko ḳhudā qubūl nahīñ

mirā bhī dil nahīñ lagtā ghane makānoñ meñ

use bhī shahr kī āb-o-havā qubūl nahīñ

pahuñch to saktā huuñ manzil pe aap se pahle

magar maiñ kyā karūñ jab rāstā qubūl nahīñ

ki jis se sher meñ ma.anī kā iltavā hī na ho

suḳhan ke baab meñ vo tajraba qubūl nahīñ

maiñ vo faqīr huuñ jis ko diloñ ke tāqchoñ meñ

ḳhudā qubūl hai ḳhauf-e-ḳhudā qubūl nahīñ

vo husn hai use zebā tamām rāz-o-niyāz

maiñ ishq huuñ mujhe shikva gila qubūl nahīñ

dil-o-dimāġh pe taarī hai us kā ishq 'fidā'

dil-o-dimāġh ko duniyā bhī nā-qubūl nahīñ

dawa asar nahin rakhti dua qubul nahin

ye kaise log hain jin ko KHuda qubul nahin

mera bhi dil nahin lagta ghane makanon mein

use bhi shahr ki aab-o-hawa qubul nahin

pahunch to sakta hun manzil pe aap se pahle

magar main kya karun jab rasta qubul nahin

ki jis se sher mein mani ka iltawa hi na ho

suKHan ke bab mein wo tajraba qubul nahin

main wo faqir hun jis ko dilon ke taqchon mein

KHuda qubul hai KHauf-e-KHuda qubul nahin

wo husn hai use zeba tamam raaz-o-niyaz

main ishq hun mujhe shikwa gila qubul nahin

dil-o-dimagh pe tari hai us ka ishq 'fida'

dil-o-dimagh ko duniya bhi na-qubul nahin