dawa aur dua be-asar ho gai

davā aur duā be-asar ho ga.ī

mohabbat mirī puḳhta-tar ho ga.ī

vo ghabrā ga.e sun ke zikr-e-raqīb

kahānī mirī mo'atabar ho ga.ī

shab-e-ġham kahāñ aur kahāñ ek aah

ye rūdād yuuñ muḳhtasar ho ga.ī

surāhī ke siine se phūTī kiran

chalo mai-kade meñ sahar ho ga.ī

ye zulfoñ pe ārā.isheñ mustazād

kamand ab to pechīda-tar ho ga.ī

bahut chhup ke pī thī pas-e-ḳhum magar

hameñ shaiḳh sāhib ḳhabar ho ga.ī

kaTore se chhalkī thī mastī meñ jo

falak par shuā-e-qamar ho ga.ī

jo hastī thī auj-e-falak kī raqīb

vo marhūn-e-barq-e-nazar ho ga.ī

chaman meñ jo thī fikr-e-vajh-e-umīd

qafas meñ vo zer-o-zabar ho ga.ī

chaman se qafas tak thī manzil kaḌī

magar lutf-e-gul-chīñ se sar ho ga.ī

tire qalb kī ik machaltī kiran

laboñ tak jo pahuñchī sahar ho ga.ī

qasam tere sar kī mohabbat tirī

na chāhī thī maiñ ne magar ho ga.ī

nahīñ rabt-e-gesū kā 'kausar' asar

tabī.at hī āshufta-sar ho ga.ī

dawa aur dua be-asar ho gai

mohabbat meri puKHta-tar ho gai

wo ghabra gae sun ke zikr-e-raqib

kahani meri mo'atabar ho gai

shab-e-gham kahan aur kahan ek aah

ye rudad yun muKHtasar ho gai

surahi ke sine se phuTi kiran

chalo mai-kade mein sahar ho gai

ye zulfon pe aaraishen mustazad

kamand ab to pechida-tar ho gai

bahut chhup ke pi thi pas-e-KHum magar

hamein shaiKH sahib KHabar ho gai

kaTore se chhalki thi masti mein jo

falak par shua-e-qamar ho gai

jo hasti thi auj-e-falak ki raqib

wo marhun-e-barq-e-nazar ho gai

chaman mein jo thi fikr-e-wajh-e-umid

qafas mein wo zer-o-zabar ho gai

chaman se qafas tak thi manzil kaDi

magar lutf-e-gul-chin se sar ho gai

tere qalb ki ek machalti kiran

labon tak jo pahunchi sahar ho gai

qasam tere sar ki mohabbat teri

na chahi thi main ne magar ho gai

nahin rabt-e-gesu ka 'kausar' asar

tabiat hi aashufta-sar ho gai