dekh kar dagh-e-dil-e-raushan ko hum

dekh kar dāġh-e-dil-e-raushan ko ham

bhuul baiThe lāla-e-gulshan ko ham

ab tirā dāman hai aur dast-e-junūñ

chhoḌte haiñ apne pairāhan ko ham

ho ga.e pāband-e-taslīm-o-razā

ab jhukā.e rakhte haiñ gardan ko ham

jis ke nāvak se huā dil kā shikār

bhūleñ kyūñkar aise tīr-afgan ko ham

gard-e-ġham jab se ki baiThī ham-nashīñ

muddatoñ jhaTkā kiye dāman ko ham

ham-safīro bas yahī qismat meñ thā

ro.e gulshan ham ko aur gulshan ko ham

ishq se 'mas.ūd' aajiz ho chuke

ab na deñge dil kisī pur-fan ko ham

dekh kar dagh-e-dil-e-raushan ko hum

bhul baiThe lala-e-gulshan ko hum

ab tera daman hai aur dast-e-junun

chhoDte hain apne pairahan ko hum

ho gae paband-e-taslim-o-raza

ab jhukae rakhte hain gardan ko hum

jis ke nawak se hua dil ka shikar

bhulen kyunkar aise tir-afgan ko hum

gard-e-gham jab se ki baiThi ham-nashin

muddaton jhaTka kiye daman ko hum

ham-safiro bas yahi qismat mein tha

roe gulshan hum ko aur gulshan ko hum

ishq se 'masud' aajiz ho chuke

ab na denge dil kisi pur-fan ko hum