dekh kar ek jalwe ko tere gir hi paDa be-KHud ho musa

dekh kar ik jalve ko tere gir hī paḌā be-ḳhud ho muusā

un āñkhoñ ke sadqe jā.ūñ jo haiñ har-dam mahv-e-tamāshā

zohd-o-vara.a par bhuul na zāhid husn kā munkir ho na divāne

san.āñ se ko le gayā ġhāfil ek adā meñ ishva-e-tarsā

dekh tajallī husn kī tere koh bahe jab ho kar paanī

dīvānā sā bhāgā vohīñ chaak garebāñ kar ke dariyā

kyuuñ na garebāñ phāḌūñ apnā haath aur merā us kā dāman

tāle.a haiñ aa kar ke huā hai dāman-e-yūsuf dast-e-zuleḳhā

roz ke va.ade roz bahāne roz ye kahnā ā.ūñgā kal

fā.eda kyā in bātoñ kā hai ham ne miyāñ bas tum ko dekhā

zulf-e-mo.ambar us ne jo kholī to yuuñ mahfil saarī mahkī

aave chaman se mausam-e-gul meñ bād-e-sabā kā jaise jhoñkā

madh meñ bharā hai jauban ke vo husn se us ke Tapke hai mastī

chāh-e-zaqan hai jām-e-bilorīñ aur ġhabġhab hai shīsha-e-sahbā

niim nigah par dete haiñ dil ko jaano to kuchh le lo sāhab

phir na milegā varna tum ko hargiz aisā sastā saudā

kyuuñ na chhake dil dekh ke us ko jis saaqī kā hove yaaro

dast-e-nigārīñ panja-e-marjāñ sā.ad-e-sīmīñ gardan-e-mīnā

'mus.hafī' kar ke chaak garebāñ chal jañgal ko ai dīvāne

dekh to kyā phūlā hai laala surḳh hai kaisā dāman-e-sahrā

dekh kar ek jalwe ko tere gir hi paDa be-KHud ho musa

un aankhon ke sadqe jaun jo hain har-dam mahw-e-tamasha

zohd-o-wara par bhul na zahid husn ka munkir ho na diwane

sanan se ko le gaya ghafil ek ada mein ishwa-e-tarsa

dekh tajalli husn ki tere koh bahe jab ho kar pani

diwana sa bhaga wohin chaak gareban kar ke dariya

kyun na gareban phaDun apna hath aur mera us ka daman

talea hain aa kar ke hua hai daman-e-yusuf dast-e-zuleKHa

roz ke wade roz bahane roz ye kahna aaunga kal

faeda kya in baaton ka hai hum ne miyan bas tum ko dekha

zulf-e-moambar us ne jo kholi to yun mahfil sari mahki

aawe chaman se mausam-e-gul mein baad-e-saba ka jaise jhonka

madh mein bhara hai jauban ke wo husn se us ke Tapke hai masti

chah-e-zaqan hai jam-e-bilorin aur ghabghab hai shisha-e-sahba

nim nigah par dete hain dil ko jaano to kuchh le lo sahab

phir na milega warna tum ko hargiz aisa sasta sauda

kyun na chhake dil dekh ke us ko jis saqi ka howe yaro

dast-e-nigarin panja-e-marjaan saad-e-simin gardan-e-mina

'mushafi' kar ke chaak gareban chal jangal ko ai diwane

dekh to kya phula hai lala surKH hai kaisa daman-e-sahra