dekh kar izn-e-tarab saqi-o-maiKHane ka

dekh kar izn-e-tarab sāqī-o-maiḳhāne kā

jhuk ke muñh chuum liyā shīshe ne paimāne kā

sāz-e-ishrat se nikaltī hai sadā-e-mātam

kyā ye duniyā hai muraqqā mire ġham-ḳhāne kā

nazar aatī hai har ik but meñ ḳhudā kī sūrat

silsila ka.abe se miltā hai sanam-ḳhāne kā

aaj vo mahfil-e-aġhyār meñ aatā hai nazar

dil mirā aa.ina hai jis ke parī-ḳhāne kā

haram-o-dair meñ kis tarah lage dil us kā

jis kī nazroñ meñ ho naqsha tire kāshāne kā

'bedil' is tarah se kuchh umr basar kī maiñ ne

zindagī kā huā itlāq na mar jaane kā

dekh kar izn-e-tarab saqi-o-maiKHane ka

jhuk ke munh chum liya shishe ne paimane ka

saz-e-ishrat se nikalti hai sada-e-matam

kya ye duniya hai muraqqa mere gham-KHane ka

nazar aati hai har ek but mein KHuda ki surat

silsila kabe se milta hai sanam-KHane ka

aaj wo mahfil-e-aghyar mein aata hai nazar

dil mera aaina hai jis ke pari-KHane ka

haram-o-dair mein kis tarah lage dil us ka

jis ki nazron mein ho naqsha tere kashane ka

'bedil' is tarah se kuchh umr basar ki main ne

zindagi ka hua itlaq na mar jaane ka