dekh kar usko nahin hosh mein aaya jata

dekh kar us ko nahīñ hosh meñ aayā jaatā

ḳhud-baḳhud dil meñ hai ik shaḳhs samāyā jaatā

us ke dīdār kī pyāsī thiiñ nigāheñ us kī

kaash bīmār-e-mohabbat na satāyā jaatā

ham to har haal meñ rāzī-ba-razā the lekin

maan jaatā ba-ḳhushī vo to manāyā jaatā

jis ne nā-vaqt bujhā dī mirī sham-e-ummīd

mujh se vo va.ada-shikan kaise bhulāyā jaatā

pher letā na agar dekh ke āñkheñ mujh se

dil se dil haath se phir haath milāyā jaatā

us kī mahfil meñ kamī kā thā sabhī ko ehsās

hotā aane ko vo raazī to bulāyā jaatā

jaane kyoñ pyaar ke dushman haiñ zamāne vaale

āsmāñ sar pe nahīñ aise uThāyā jaatā

hai ye kirdār-kushī is ko sahāfat na kaheñ

kar ke badnām nahīñ naam kamāyā jaatā

mahfil-e-aish-o-tarab meñ nahīñ ab jī lagtā

hote gar saath jo tum jashn manāyā jaatā

kho diyā tū ne vaqār apnā mirī nazroñ meñ

kar ke ehsān nahīñ aise jatāyā jaatā

be-gunāhī kī sazā denī na hotī jo mujhe

taḳhta-e-mashq-e-sitam kaise banāyā jaatā

shukriya aa ga.e tum vaqt pe milne varna

bār-e-ġham kaise akele ye uThāyā jaatā

mere vālid kā tasarruf hai mirā arz-e-hunar

varna maiñ bazm-e-adab meñ nahīñ paayā jaatā

misra-e-tarah se haalī ke qalam thā mar.ūb

varna kuchh zor-e-qalam apnā dikhāyā jaatā

bad-gumānī kā guzar hotā na dil meñ 'barqī'

rasm-e-ulfat ko hamesha jo nibhāyā jaatā

dekh kar us ko nahin hosh mein aaya jata

KHud-baKHud dil mein hai ek shaKHs samaya jata

us ke didar ki pyasi thin nigahen us ki

kash bimar-e-mohabbat na sataya jata

hum to har haal mein raazi-ba-raza the lekin

man jata ba-KHushi wo to manaya jata

jis ne na-waqt bujha di meri sham-e-ummid

mujh se wo wada-shikan kaise bhulaya jata

pher leta na agar dekh ke aankhen mujh se

dil se dil hath se phir hath milaya jata

us ki mahfil mein kami ka tha sabhi ko ehsas

hota aane ko wo raazi to bulaya jata

jaane kyon pyar ke dushman hain zamane wale

aasman sar pe nahin aise uThaya jata

hai ye kirdar-kushi is ko sahafat na kahen

kar ke badnam nahin nam kamaya jata

mahfil-e-aish-o-tarab mein nahin ab ji lagta

hote gar sath jo tum jashn manaya jata

kho diya tu ne waqar apna meri nazron mein

kar ke ehsan nahin aise jataya jata

be-gunahi ki saza deni na hoti jo mujhe

taKHta-e-mashq-e-sitam kaise banaya jata

shukriya aa gae tum waqt pe milne warna

bar-e-gham kaise akele ye uThaya jata

mere walid ka tasarruf hai mera arz-e-hunar

warna main bazm-e-adab mein nahin paya jata

misra-e-tarah se haali ke qalam tha marub

warna kuchh zor-e-qalam apna dikhaya jata

bad-gumani ka guzar hota na dil mein 'barqi'

rasm-e-ulfat ko hamesha jo nibhaya jata