dekh ke jis ko kabhi dil bhi na dhaDka apna

dekh ke jis ko kabhī dil bhī na dhaḌkā apnā

yaad kyoñ aatā hai rah rah ke vo chehra ham ko

har taraf se jo ye dil TuuTā to dhyān aatā hai

haa.e ik shaḳhs ne kis darja thā chāhā ham ko

saarā din dhuup meñ jhulse haiñ to ab shaam Dhale

kyoñ bulātā hai har ik peḌ ghanerā ham ko

us kī chāhat ko sahārā na kahūñ jiine kā

raas aatā nahīñ koī bhī sahārā ham ko

har-nafas ham ne sarāboñ meñ guzārā 'fīroz'

har ghaḌī paas bulātā rahā dariyā ham ko

dekh ke jis ko kabhi dil bhi na dhaDka apna

yaad kyon aata hai rah rah ke wo chehra hum ko

har taraf se jo ye dil TuTa to dhyan aata hai

hae ek shaKHs ne kis darja tha chaha hum ko

sara din dhup mein jhulse hain to ab sham Dhale

kyon bulata hai har ek peD ghanera hum ko

us ki chahat ko sahaara na kahun jine ka

ras aata nahin koi bhi sahaara hum ko

har-nafas hum ne sarabon mein guzara 'firoz'

har ghaDi pas bulata raha dariya hum ko