dekh leta main bhi jalwa sho’la-e-ruKHsar ka

dekh letā maiñ bhī jalva sho’la-e-ruḳhsār kā

rah gayā dil meñ mire armāñ visāl-e-yār kā

mah-vashoñ meñ vo hai yaktā barq hai us kī adā

qābil-e-tahsīñ hai jalva us jamāl-e-yār kā

ik jhalak dikhlā ke vo rū-posh mujh se ho gayā

dil taḌap kar rah gayā phir shauq hai dīdār kā

rauñd Daale saikḌoñ ke dil ḳhirām-e-nāz se

har taraf charchā hai un ke fitna-e-raftār kā

kaun mūnis thā shab-e-ġham meñ jo kartā dil-dahī

dard hī mūnis banā uTh kar tire bīmār kā

iztirāb-e-dil mirā 'bāsir' huā had se sivā

jab nazar ke sāmne aayā vo jalva yaar kā

dekh leta main bhi jalwa sho’la-e-ruKHsar ka

rah gaya dil mein mere arman visal-e-yar ka

mah-washon mein wo hai yakta barq hai us ki ada

qabil-e-tahsin hai jalwa us jamal-e-yar ka

ek jhalak dikhla ke wo ru-posh mujh se ho gaya

dil taDap kar rah gaya phir shauq hai didar ka

raund Dale saikDon ke dil KHiram-e-naz se

har taraf charcha hai un ke fitna-e-raftar ka

kaun munis tha shab-e-gham mein jo karta dil-dahi

dard hi munis bana uTh kar tere bimar ka

iztirab-e-dil mera 'basir' hua had se siwa

jab nazar ke samne aaya wo jalwa yar ka