dekh lete ho mohabbat se yahi kafi hai

dekh lete ho mohabbat se yahī kaafī hai

dil dhaḌaktā hai suhūlat se yahī kaafī hai

muddatoñ se nahīñ dekhā tirā jalva lekin

yaad aa jaate ho shiddat se yahī kaafī hai

jo bhī raste meñ guzartā hai mire pahlū se

dekhtā hai tirī nisbat se yahī kaafī hai

mere āñgan meñ utartā nahīñ vo chāñd kabhī

dekh lete haiñ use chhat se yahī kaafī hai

saarī duniyā se ulajhte haiñ magar terā kahā

maan lete haiñ sharāfat se yahī kaafī hai

haal duniyā ke satā.e hue kuchh logoñ kā

pūchh lete ho sharārat se yahī kaafī hai

kyā huā ham ko mayassar jo zar-o-māl nahīñ

kaT rahī hai baḌī 'izzat se yahī kaafī hai

aaj ke ‘ahd-e-taġhāful meñ kisī dar pe 'munīr'

koī aa jaa.e zarūrat se yahī kaafī hai

dekh lete ho mohabbat se yahi kafi hai

dil dhaDakta hai suhulat se yahi kafi hai

muddaton se nahin dekha tera jalwa lekin

yaad aa jate ho shiddat se yahi kafi hai

jo bhi raste mein guzarta hai mere pahlu se

dekhta hai teri nisbat se yahi kafi hai

mere aangan mein utarta nahin wo chand kabhi

dekh lete hain use chhat se yahi kafi hai

sari duniya se ulajhte hain magar tera kaha

man lete hain sharafat se yahi kafi hai

haal duniya ke satae hue kuchh logon ka

puchh lete ho shararat se yahi kafi hai

kya hua hum ko mayassar jo zar-o-mal nahin

kaT rahi hai baDi 'izzat se yahi kafi hai

aaj ke ‘ahd-e-taghaful mein kisi dar pe 'munir'

koi aa jae zarurat se yahi kafi hai