dekh us pari se kijiye kya ab to ja lagi

dekh us parī se kījiye kyā ab to jā lagī

chhoTī hī koī baat hai phir ye balā lagī

us lab pe dekhte hī se vo paan kī dhaḌī

shām-o-shafaq in āñkhoñ meñ kab ḳhushnumā lagī

ye dastaras kise ki kare us ko dast-bos

sau minnatoñ se paañv meñ us ke hinā lagī

maiñ kyā kiyā ki mujh ko nikāle hai vo sanam

ai ahl-e-bazm koī to bolo ḳhudā lagī

kis tarah hāl-e-dil kahūñ us gul se baaġh meñ

phirtī hai us ke saath to har-dam sabā lagī

is dard-e-dil kā pūchhiye kis se ilaaj jā

apnī sī kar chuke pa na koī davā lagī

aayā jo mehrbāñ ho sitamgar tū is taraf

kis vaqt kī na jāniye tujh ko duā lagī

itnā to vo nahīñ hai ki 'bedār' diije dil

kyā jaane pyārī us kī tujhe kyā adā lagī

dekh us pari se kijiye kya ab to ja lagi

chhoTi hi koi baat hai phir ye bala lagi

us lab pe dekhte hi se wo pan ki dhaDi

sham-o-shafaq in aankhon mein kab KHushnuma lagi

ye dastaras kise ki kare us ko dast-bos

sau minnaton se panw mein us ke hina lagi

main kya kiya ki mujh ko nikale hai wo sanam

ai ahl-e-bazm koi to bolo KHuda lagi

kis tarah haal-e-dil kahun us gul se bagh mein

phirti hai us ke sath to har-dam saba lagi

is dard-e-dil ka puchhiye kis se ilaj ja

apni si kar chuke pa na koi dawa lagi

aaya jo mehrban ho sitamgar tu is taraf

kis waqt ki na jaaniye tujh ko dua lagi

itna to wo nahin hai ki 'bedar' dije dil

kya jaane pyari us ki tujhe kya ada lagi