dekha aTa hua jo gulon ko ghubar mein

dekhā aTā huā jo guloñ ko ġhubār meñ

masrūf haiñ ghaTā.eñ chaman ke nikhār meñ

itne haiñ daaġh aa nahīñ sakte shumār meñ

til bhar kī bhī jagah na dil-e-dāġh-dār meñ

sau meñ bhalā hai ab na bhalā hai hazār meñ

barakat hī ab rahī na kisī kārobār meñ

paañv ke ābloñ se mire aa ke pūchhiye

kyā lazzat-o-maza hai nihāñ nok-e-ḳhār meñ

jiitā huuñ un kī abrū-e-ḳhamdār dekh kar

pinhāñ hai zindagī mirī ḳhanjar kī dhaar meñ

hogā vafā na va.ada-e-fardā tamām umr

rakkheñge hashr tak vo mujhe intizār meñ

is muddat-e-madīd kī kuchh intihā bhī hai

roz-e-azal se hashr ke huuñ intizār meñ

jāñkandanī se chhūT ke aa kar paḌe the ham

aate hī aan pahuñche farishte mazār meñ

mujh sā milegā chāhne vaalā na aap ko

das biis meñ pachās meñ sau meñ hazār meñ

sayyād tujh sā hogā na koī sitam-zarīf

bulbul ko qaid kartā hai fasl-e-bahār meñ

bigḌī kā apnī zikr karūñ un se kis ghaḌī

rahte haiñ har ghaḌī vo banāo-siñghār meñ

rakhte haiñ saath jeb meñ kanghā aur aa.ina

rahte haiñ ab to mard bhī har-dam siñghār meñ

saudāgarī bhī saudā hai jab tajraba nahīñ

de baiThe sab dukān vo apnī udhār meñ

har-dam nigāh dar pe mirī hai lagī huī

āñkheñ haiñ farsh-e-rāh tire intizār meñ

ahl-e-suḳhan kī zarra-navāzī hai ye 'atā'

ahl-e-suḳhan ke aa ga.e ham bhī shumār meñ

dekha aTa hua jo gulon ko ghubar mein

masruf hain ghaTaen chaman ke nikhaar mein

itne hain dagh aa nahin sakte shumar mein

til bhar ki bhi jagah na dil-e-dagh-dar mein

sau mein bhala hai ab na bhala hai hazar mein

barakat hi ab rahi na kisi karobar mein

panw ke aablon se mere aa ke puchhiye

kya lazzat-o-maza hai nihan nok-e-KHar mein

jita hun un ki abru-e-KHamdar dekh kar

pinhan hai zindagi meri KHanjar ki dhaar mein

hoga wafa na wada-e-farda tamam umr

rakkhenge hashr tak wo mujhe intizar mein

is muddat-e-madid ki kuchh intiha bhi hai

roz-e-azal se hashr ke hun intizar mein

jaankandani se chhuT ke aa kar paDe the hum

aate hi aan pahunche farishte mazar mein

mujh sa milega chahne wala na aap ko

das bis mein pachas mein sau mein hazar mein

sayyaad tujh sa hoga na koi sitam-zarif

bulbul ko qaid karta hai fasl-e-bahaar mein

bigDi ka apni zikr karun un se kis ghaDi

rahte hain har ghaDi wo banao-singhaar mein

rakhte hain sath jeb mein kangha aur aaina

rahte hain ab to mard bhi har-dam singhaar mein

saudagari bhi sauda hai jab tajraba nahin

de baiThe sab dukan wo apni udhaar mein

har-dam nigah dar pe meri hai lagi hui

aankhen hain farsh-e-rah tere intizar mein

ahl-e-suKHan ki zarra-nawazi hai ye 'ata'

ahl-e-suKHan ke aa gae hum bhi shumar mein