dekha jo saya shab mein ye samjha nigah ne

dekhā jo saaya shab meñ ye samjhā nigāh ne

shāyad vo aaj aa ga.e va.ada nibāhane

vīrāñ sī is navāh meñ aatā hī kaun thā

ābād kar diyā hai ise qatl-gāh ne

un qātiloñ pe kaun muqadma chalā.egā

jin ko liyā panāh meñ ālam-panāh ne

har baat pe jo mujh se ye kahte haiñ chup raho

kyā apne husn ko bhī na deñge sarāhne

qaa.em unhīñ faqīroñ ke dam se thī saltanat

jin ko kiyā hai mulk-badar sarbarāh ne

achchhā huā sahar ne ulaT dī naqāb-e-fikr

bhaTkā diyā thā raat mujhe vaah vaah ne

kāġhaz agar siyāh kareñ to kareñ harīf

sūraj ugaa.e haiñ mirī fikr-o-nigāh ne

dekha jo saya shab mein ye samjha nigah ne

shayad wo aaj aa gae wada nibahane

viran si is nawah mein aata hi kaun tha

aabaad kar diya hai ise qatl-gah ne

un qatilon pe kaun muqadma chalaega

jin ko liya panah mein aalam-panah ne

har baat pe jo mujh se ye kahte hain chup raho

kya apne husn ko bhi na denge sarahne

qaem unhin faqiron ke dam se thi saltanat

jin ko kiya hai mulk-badar sarbarah ne

achchha hua sahar ne ulaT di naqab-e-fikr

bhaTka diya tha raat mujhe wah wah ne

kaghaz agar siyah karen to karen harif

suraj ugae hain meri fikr-o-nigah ne